Այսօր Կառավարության նիստի ժամանակ ՀՀ վարչապետ Նիկոլ Փաշինյանը շատ կարևոր համարեց ուշադրություն դարձնել բանակում իրականացրած ևս մեկ շատ խորքային, ինստիտուցիոնալ փոփոխությանը, որը ժամկետային զինծառայողների կամավոր ատեսատավորման միջոցով պայմանագրային զինծառայության անցնելն է, որտեղ կան կոնկրետ արդյուքներ։

«Երբ ասում էինք, որ պետք է պրոֆեսիոնալ բանակ հիմնենք և պետք է ժամկետային զինծառայության բանաձևերը և մոտեցումները փոփոխություն կրեն, այն ժամանակ շատ քննադատություններ էին ուղղված, թե ինչպե՞ս է արվելու, այս ի՞նչ ծրագիր է։ Նախորդ օրվա ռեպորտաժը, որը ՊՆ-ն հրապարակել է, այս դահլիճում հայտարարած և նաև այլ ֆորմատներով հայտարարածի կոնկրետ իրականացումն է»,- ասաց Նիկոլ Փաշինյանը։

ՀՀ վարչապետը ևս մեկ կարևոր լուր հայտնեց.

«Մեր դիտարկմամբ՝ այս տարի մենք կունենանք Վազգեն Սարգսյանի անվան ռազմական համալսարան դիմորդների բավականին մեծ թիվ, զգալի աճ»,- հայտարարեց Նիկոլ Փաշինյանը՝ նշելով, որ թվերը չենք կարող հրապարակել։

«Զգալի աճ ունենք և դա կապված է այս դահլիճում կայացրած մեկ այլ որոշման հետ, որ Վազգեն Սարգսյանի անվան ռազմական համալսարան ընդունված, ավարտած և ծառայության անցած սպաները ծառայության անցնելու պահին կստանան բնակարան։

Կարգավորումները այնպես ենք արել, որ դա կհամարվի իր սեփականությունը, բայց ծառայության ավարտն այն օտարելու հնարավորություն չենք ունենա»։

Կառավարության ղեկավարն ասաց, որ ենթադրաբար բնակարանները կարող են լինել նաև Երևանում։ Ըստ Նիկոլ Փաշինյանի՝ այն սպաները, ովքեր բնակարան կստանան Երևանում, բայց ծառայությունը կլինի, օրինակ, Սյունիքում՝ կարող են բնակարանները վարձակալության տալ և իրենց ընտանիքի կարիքները լրացուցիչ բավարարել։

Վարչապետն ընդգծեց, որ իրենց ծրագրերում է սպայական համալսարան և սպայական ավագ դպրոց ունենալը, որը տեղակայված կլինի Ակադեմիական քաղաքում։