ՀՀ Էկոնոմիկայի նախարար Վահան Քերոբյանը կառավարության նիստում ներկայացրել է գյուղատնտեսության ոլորտի զարգացման ռազմավարությունը։

Նախարարի խոսքով` յուրաքանչյուր 3 տարին մեկ թարմացվում է այդ ռազմավարությունը։ Այս անգամ նախարարը ներկայացրեց այն 7 ոլորտները, որոնք պատրաստվում են զարգացնել։

«Գյուղատնտեսության համախառն արտադրանքը հասցնել 1.4 տրիլիոն դրամի, որը 2020թ. կազմել է 835 միլիարդ դրամ, իսկ անցած տարի կազմել է 1 տրիլիոնից ավել։ Խոշորացման և արդյունավետ մշակման արդյունքում գյուղացիական տնտեսությունների թիվը նվազեցնել ներկայիս 317 հազարից մինչև 280 հազարի»,- ասել է նախարարը։

Ըստ նախարարի՝ շատ կարևոր է նաև անցումը թվային գյուղատնտեսությանը։

«Մեր ծրագրերից մեկը սուբսիդավորման նոր համակարգի մշակումն է։ Սուբսիդիա ստանալու են առաջին հերթին ֆերմերները։ Հիմա դա այդքան էլ այդպես չէ, քանի որ սուբսիդավորում ենք բանկերին, մթերող կազմակերպություններին և մատակարար կազմակերպություններին։ Նոր մոդելի մեջ փորձելու ենք այնպես անել, որ շահառուն լինի հենց ֆերմերը»,- ավելացրել է Քերոբյանը։