Ադրբեջանի ԱԳՆ-ն մեկնաբանել է ՀՀ վարչապետ Նիկոլ Փաշինյանի՝ կառավարության նիստում այսօր ունեցած ելույթի ժամանակ արված հայտարարությունները։ 

«ՀՀ վարչապետ Նիկոլ Փաշինյանը կառավարության այսօրվա նիստում իր ելույթում, խոսելով Բրյուսելում ղեկավարների մակարդակով հանդիպման մասին, հերթական անգամ հնչեցրեց Լաչինի ճանապարհի հետ կապված պնդումները, որոնք կրկնում է վերջին 8 ամիսների ընթացքում։ Սրանով նա ցույց տվեց հայկական կողմի մտադրությունը՝ օգտագործել այս հարցը քաղաքական նպատակներով, ինչպես նաև խոչընդոտել խաղաղության համաձայնագրի շուրջ բանակցություններին, որոնք վերջին շրջանում առաջ են ընթանում»,- ասված է հայտարարությունում։

Ըստ ԱԳՆ-ի՝ Ադրբեջանը Հայաստանին բազմիցս կոչ է արել «դադարեցնել Լաչինի ճանապարհին իր կողմից իրականացվող անօրինական գործողությունները, սակայն Հայաստանն անտեսել է այդ կոչերը», ուստի Ադրբեջանն ստեղծել է Լաչինի սահմանային անցակետը և վերջին մի քանի ամիսների ընթացքում «ապահովել սահմանային անցակետի թափանցիկ և կանոնավոր հատումը հայ բնակիչների և բեռնատարների կողմից»։ 

Նշվում է, որ Աղդամ-Ստեփանակերտ ճանապարհից հայկական կողմի հրաժարումը վկայում է տարածաշրջանում լարված հումանիտար իրավիճակի մասին պնդումների անհիմն լինելը։ 

«Սխալ են նաև հայկական կողմի հայտարարությունները, թե Ադրբեջանը քայլեր է ձեռնարկում տարածաշրջանում էթնիկ զտումներ իրականացնելու համար։ Ադրբեջանը երբեք հայ բնակիչների նկատմամբ էթնիկ զտումների քաղաքականություն չի վարել։ Այն, որ Հայաստանի վարչապետը, ճանաչելով Ղարաբաղը որպես Ադրբեջանի տարածք, հայ բնակիչների վերաինտեգրումն Ադրբեջանին խրախուսելու փոխարեն երկխոսության համար պայմաններ է առաջադրում, դիտվում է որպես Ադրբեջանի ինքնիշխանության և տարածքային ամբողջականության դեմ ուղղված քայլ»,- ասված է հայտարարությունում։

Ադրբեջանի ԱԳՆ-ն շեշտում է, որ ադրբեջանական կողմը շահագրգռված է տարածաշրջանում խաղաղության, կայունության և անվտանգության հաստատմամբ և հանդիսանում է բանակցային գործընթացի ակտիվ մասնակից։ Եթե ​​հայկական կողմը շահագրգռված է խաղաղությամբ, ապա պետք է ձեռնպահ մնա խաղաղության գործընթացին խոչընդոտող քայլերից։