Իրանի և Ադրբեջանի արտգործնախարարները հեռախոսազրույց են ունեցել։ Հոսեյն Ամիր Աբդոլաիանը և Ջեյհուն Բայրամովը քննարկել են երկկողմ համագործակցության կարևորագույն հարցերը և տարածաշրջանային խնդիրները։
Իրանի արտգործնախարարության ղեկավարն ասել է, որ ներկայումս երկու երկրների համագործակցության գործընթացը կառուցողական և դրական ուղու վրա է։
Ադրբեջանի արտգործնախարարը կարևոր է համարել Աբդոլաիանի վերջին այցը Բաքու և հավելել, որ մոտ ապագայում «կտեսնեն դրական ազդեցությունը» երկու երկրների հարաբերությունների վրա։
«Ջեյհուն Բայրամովը շնորհակալություն է հայտնել Իրանի Իսլամական Հանրապետությանը Ղարաբաղի հարցում կառուցողական դիրքորոշման համար և պարզաբանել Հայաստանի հետ բանակցությունների վերջին ընթացքը և Լաչինի միջանցքի շուրջ ստեղծված իրավիճակը»,- ասված է հայտարարությունում։
Կողմերը տարածաշրջանում օտար ուժերի ներկայությունն ու միջամտությունն անվանել են ոչ կառուցողական գործողություններ և ընդգծել տարածաշրջանային խնդիրների լուծման անհրաժեշտությունը տարածաշրջանի երկրների կողմից։
