Հայաստանում հավատարմագրված դեսպաններն այսօր այցելել են Կոռնիձոր և տեղում դիտարկում են ստեղծված իրավիճակը: 

Լրագրողների հետ ճեպազրույցում ՀՀ ԱԳ նախարարի տեղակալ Վահան Կոստանյանն ասաց, որ շարունակելու են իրազեկել գործընկերներին իրավիճակի մասին։ «Մենք շարունակելու ենք աշխատանքներ տանել, որպեսզի ի վերջո Ադրբեջանը կյանքի կոչի այն պարտավորությունները, որոնք միջազգայնորեն է ստանձնել։ Շատ կարևոր է մեր միջազգային գործընկերների հավելյալ ճնշումը Ադրբեջանի իշխանությունների վրա»։

Նրա խոսքով՝ անհրաժեշտ է, որ ոչ միայն ազդակներ լինեն Ադրբեջանի իշխանություններին, այլ նաև հստակ քայլեր ձեռնարկեն, որոնք թույլ կտան ապահովել բեռների ու, առհասարակ, մարդկանց անխափան անցումը։

Հարցին՝ արդյո՞ք հայկական կողմը պատրաստվում է՝ Հաագայի դատարանի որոշումները չկատարելու հիմքով դիմել ՄԱԿ-ի Անվտանգության խորհրդին հրատապ նիստ հրավիրել ու ինչ-որ որոշում կայացնել, Կոստանյանը պատասխանեց, որ հայկական կողմը դիտարկում է դիվանագիտական գործիքակազմում առկա բոլոր միջոցները պատշաճ պահին, ըստ անհրաժեշտության իրացնելու հնարավորությունը։