Ռուսաստանում զորակոչային տարիքն ավելացվել է

ՌԴ նախագահ Վլադիմիր Պուտինը օրենք է ստորագրել, որը ընդլայնում է զորակոչային տարիքի սահմանները՝ հասցնելով 18-30-ի:

Օրենքը հրապարակվել է իրավական ակտերի պաշտոնական պորտալում։ Փաստաթուղթը փոփոխության է ենթարկում «Զինապարտության և զինվորական ծառայության մասին» օրենքում զորակոչի նորմերը:

Նոր օրենքը սահմանում է, որ Ռուսաստանում ժամկետային ծառայության զորակոչի ստորին շեմը մնում է նույնը՝ 18 տարեկան: Վերին նշաձողը 27-ից բարձրանում է 3 տարով՝ մինչև 30 տարեկան։

Սույն օրենքն ուժի մեջ է մտնում 2024թ․ հունվարի 1-ից:
Զորակոչային տարիքի վերին սահմանի փուլային բարձրացում օրենքը չի ենթադրում. 2024 թվականի սկզբից պարտադիր զինվորական ծառայության զորակոչվելու են 18-30 տարեկան ռուսաստանցիները։

Բացի այդ, Պուտինը ստորագրել է օրենք, որն արգելում է քաղաքացու համար արտասահման մեկնելը ծանուցագիրը նրան հանձնելու օրվանից, այդ թվում՝ աշխատանքի կամ ուսման համար: 

Պաշտպանության նախարարությունում հավաստիացրել են, որ Ռուսաստանի քաղաքացիները, որոնց 27 տարին կլրանա 2023 թվականին, զորակոչի ենթակա չեն լինի։