CNN-ը, վկայակոչելով ԱՄՆ վարչակազմում չորս աղբյուրների, հայտնում է, որ Վլադիմիր Պուտինը մտադիր է ձգձգել Ուկրաինայում պատերազմը մինչև 2024 թվականի վերջին նախագահական ընտրությունները։
Պուտինը հույս ունի, որ այս ընտրություններում կհաղթի Դոնալդ Թրամփը, կամ գուցե մեկ այլ հանրապետական, ով այդքան ակտիվ չի լինի Ուկրաինային օգնելու հարցում։ Դա կհանգեցնի նրան, որ Ռուսաստանի դիրքերը պոտենցիալ բանակցություններում կամրապնդվեն։
«Պուտինը գիտի, որ Թրամփը կօգնի իրեն։ Ինչպես դա գիտեն և՛ ուկրաինացիները, և՛ մեր եվրոպացի գործընկերները»,– նշել է CNN-ի աղբյուրներից մեկը և հավելել․ «Ուստի, թեև որևէ հստակ բան չենք տեսել այս առումով, բայց բոլորը մտածում են դրա մասին»։
Եվրոպացի դիվանագետը, ում անունը չի նշվում, CNN-ին ասել է, որ մինչև ԱՄՆ ընտրություններն Ուկրաինայում պատերազմը ձգձգելը հանդիսանում է «Պուտինի ծրագիրը»:
Հիշեցնենք, որ Դոնալդ Թրամփը, չնայած իր դեմ նոր քրեական մեղադրանքներին, Հանրապետական կուսակցության ֆավորիտն է 2024 թվականի նախագահական ընտրություններում։
