ՄԱԿ-ի գլխավոր քարտուղար Անտոնիո Գուտերեշը Հիրոսիմայի ատոմային ռմբակոծության 78-րդ տարելիցին նվիրված հիշատակի միջոցառումների կապակցությամբ իր ուղերձում հայտարարել է, որ միջուկային պատերազմի ստվերը կրկին կախված է աշխարհի վրա։
«Միջուկային ստվերը, որը կախված էր աշխարհի վրա Սառը պատերազմի ժամանակ, նորից հայտնվել է, և որոշ երկրներ կրկին անխոհեմորեն ճոճում են միջուկային թուրը՝ սպառնալով օգտագործել ոչնչացման այդ միջոցը», – ուղերձը կարդացել է զինաթափման հարցերով գլխավոր քարտուղարի տեղակալ Իզումի Նակամիցուն:
Գուտերեշը նաև նշել է, որ անվստահությունն ու տարաձայնություններն աճում են ողջ աշխարհում։
Բացի այդ, նա կոչ է արել բոլոր երկրներին ամբողջությամբ հրաժարվել միջուկային զենքից և նշել, որ դա ՄԱԿ-ի գլխավոր նպատակներից մեկն է։ Նա դա անվանել է միջուկային պատերազմի վտանգը վերացնելու միակ միջոցը։
