Հայ-ադրբեջանական դեռևս չլուծված այս հակամարտությունում, մենք՝ հայերս, մեր ձեռքում ընդամենը մեկ լծակ ունենք, դա, այսպես կոչված, «խաղաղության պայմանագիրը» ստորագրելու կամ չստորագրելու լծակն է:
Այս մասին ասել է Հայաստանի ԱԳ նախկին նախարար Վարդան Օսկանյանը՝ իր ֆեյսբուքյան էջում հրապարակելով տեսանյութ, որում անդրադարձել է հայ-ադրբեջանական հակամարտության շրջանակում «Հայաստանի ունեցած միակ լծակին»:
«Իհարկե, այդ լծակն արդեն բավականին թուլացել է, որովհետև Հայաստանի իշխանություններն արդեն նախորոք հայտարարել են, թե ինչպիսի փաստաթուղթ են ստորագրելու: Արդեն նախօրոք ասել են, որ Արցախն Ադրբեջանի մաս է, որ պատրաստ են Հայաստանից տարածքներ զիջել: Այս բոլորն արդեն թուլացրել են այդ լծակը»,- ասել է նա:
Ըստ Օսկանյանի՝ մեր իշխանությունները դեռ հնարավորություն ունեն, իրենց բանավոր խոսքից հրաժարվելու, որը ավելի կուժեղացնի այդ լծակը և այն ավելի հզոր կդառնա մեր ձեռքում:
«Ես ուղղակի խնդրում եմ, որ մենք այսօրվա բանակցությունների մոտեցումը փոխենք: Դա լուրջ վտանգ է պարունակում: Փոխելու հնարավորություն այսօր կա, եթե մենք կարողանանք փոխել, դա էապես նվազեցնելու է պատերազմի հնարավորությունները: Փաշինյանը մեծ սխալ է արել, նա պետք է ընդունի այդ սխալը»,- նշել է նա:
