Ադրբեջանի արտաքին գործերի նախարարության խոսնակ Այխան Հաջիզադեն դիմել է Լիտվայի արտաքին գերատեսչության ղեկավար Գաբրիելիուս Լանդսբերգիսին, առաջարկելով նրան «Հայաստանին հորդորել ավելի կառուցողական մոտեցում ցուցաբերել խաղաղ բանակցություններում»։
Հաջիզադեն Լանդսբերգիսին կոչ է արել «չենթարկվել հայկական քարոզչությանը», պնդելով, որ «Լաչինի ճանապարհը Հայաստանի կողմից չարաշահվել է վերջին երեք տարիներին»։
«Ցավոք, այդ ընթացքում Լիտվան լռել է»,- հայտարարել է Ադրբեջանի արտաքին գործերի նախարարության պաշտոնական ներկայացուցիչը։
Հաջիզադեն ավելացրել է, թե «Հայաստանի չարամիտ գործողությունները կասեցնելու համար Ադրբեջանը Լաչինի ճանապարհին սահմանային անցակետ է տեղակայել և առաջարկել է օգտագործել Աղդամ-Խանքենդի ճանապարհը՝ Ադրբեջանի Ղարաբաղի շրջան ապրանքներ մատակարարելու համար»։
«Ադրբեջանը հեշտացնում է մարդկանց տեղաշարժը Լաչինով երկու ուղղություններով»,- պնդել է Հաջիզադեն:
Այսօր ավելի վաղ Գաբրիելիուս Լանդսբերգիսը թվիթերում գրել է, որ հարցը քննարկել է հայաստանցի պաշտոնակից Արարատ Միրզոյանի հետ և Բաքվին հորդորել է «ապահովել անարգել երթևեկությունը Լաչինի ճանապարհով»։
