ՌԴ ԱԳ նախարարությունը հայտնել է, որ հանդիպել են ՌԴ ԱԳ փոխնախարար Մ. Գալուզինը և ՌԴ-ում ՀՀ դեսպան Վաղարշակ Հարությունյանը։
Կողմերը քննարկել են Լաչինի միջանցքում և ԼՂ շուրջ ստեղծված իրավիճակը։ Հայտարարության մեջ, մասնավորապես, ասված է.
«Օգոստոսի 14-ին ՌԴ արտաքին գործերի փոխնախարար Մ. Յու. Գալուզինն ընդունել է Հայաստանի դեսպան Վ.Հարությունյանին։
Հիմնավոր զրույցի ընթացքում կողմերն անդրադարձել են երկկողմ օրակարգի արդիական հարցերին, այդ թվում՝ բոլոր մակարդակներում քաղաքական երկխոսության խթանմանը և տնտեսական կապերի ամրապնդմանը։
Քննարկվել է Լաչինի միջանցքում և, ընդհանրապես, Լեռնային Ղարաբաղի շուրջ ստեղծված իրավիճակի զարգացումը։ Վերահաստատվել է Ռուսաստանի, Հայաստանի և Ադրբեջանի ղեկավարների միջև 2020-2022 թվականների պայմանավորվածությունների ողջ շրջանակի խստիվ պահպանման կարևորությունը հայ-ադրբեջանական հարաբերությունների կարգավորման վերաբերյալ», – նշված է հաղորդագրության մեջ։
