Արցախի նախագահին կից հակաճգնաժամային խորհրդի նախագահ Տիգրան Պետրոսյանը փաստաթուղթ է հրապարակել՝ գրելով.
«Այս փաստաթուղթն է առաջարկել Լավրովը հուլիսի 25-ին։ Ստիպված եմ հրապարակել, որպեսզի հանրությունը հասկանա, թե ինչ է իրականում կատարվում։ Այսօր Պուտինը հնարավորություն ունի ՄԱԿ-ի անվտանգության խորհրդի նիստին փոխել իր վերաբերմունքն ու պլանները: Սպասենք»:
«Հայ բնակչության անվտանգության ու իրավունքների ապահովման հիմնական սկզբունքներ և պարամետրեր նախկին Ադրբեջանական ՍՍՀ Լեռնային Ղարաբաղի ինքնավար մարզի տարածքում՝ համապատասխան Ադրբեջանի օրենսդրությանը։
1. Օրենքի առաջ հավասարություն և իրավահավասար պաշտպանություն, Էթնիկ, լեզվական կամ կրոնական և այլ հիմքերով խտրականության բացառում։
2. Հայ բնակչության հարկադիր վերաբնակեցման կանխարգելում նրա բնակության վայրերից։
3. Տեղական իշխանություններին և զինված կազմավորումներին մասնակցելու պատրվակով հայ բնակչության նկատմամբ հալածանքների, պատժի և իրավունքների ցանկացած սահմանափակման օրենսդրական արգելք՝ բացառությամբ ռազմական հանցագործությունների մեջ դատարանի կողմից մեղավոր ճանաչված անձանց։
4. Հայ բնակչության համամասնական ներկայացվածություն օրենսդիր, դատական և գործադիր իշխանության հանրապետական, մարզային և քաղաքային կառույցներում, այդ թվում՝ Ադրբեջանի ոստիկանությունում և դատախազությունում։
5. Մասնակցություն հանրապետական, թաղային և մունիցիպալ մակարդակներում հայ բնակչությանը վերաբերող որոշումների մշակմանը և ընդունմանը.
6. Պետական հաստատություններում հայերենի ազատ օգտագործում ադրբեջաներենի հետ, այդ թվում՝ պաշտոնական նամակագրություն և գրասենյակային աշխատանք կատարելիս, ինչպես նաև կոմպակտ հայ բնակչություն ունեցող բնակավայրերի հասարակական վայրերում, ներառյալ՝ ճանապարհային նշանների, ցուցանակների և հայերենով հայտարարությունների տեղադրումը։
7. Հայ բնակչության մասնավոր սեփականության, այդ թվում՝ անշարժ գույքի և հողամասերի անձեռնմխելիություն։
8. Հասարակական կազմակերպությունների ստեղծում և դրանց անխափան գործունեության ապահովում։
9. Հայ բնակչության կրոնի ազատ դավանանքի և կրոնական հաստատությունների ու կազմակերպությունների գործունեության, նրանց ունեցվածքի անձեռնմխելիության համար անհրաժեշտ պայմանների ապահովում.
10. Հայ մշակույթի և ազգային ինքնության, այդ թվում՝ պատմամշակութային ժառանգության պահպանում և հայալեզու զանգվածային լրատվության միջոցների զարգացում։
11. Նախադպրոցական, տարրական, միջնակարգ և բարձրագույն կրթություն հայերենով ստանալը պետական և մասնավոր ուսհաստատություններում.
12. Հայաստանի և Ադրբեջանի միջև առանձին համաձայնագրի հիման վրա նախկին ԼՂԻՄ տարածքում հայ բնակչության միջև սերտ մշակութային, գիտակրթական, լրատվական, սպորտային և այլ մարդասիրական կապերի ապահովում.
13. Հայ բնակչության կողմից սահմանից այն կողմ ազատ և խաղաղ կապերի հաստատում և պահպանում այլ պետությունների տարածքում օրինական կերպով տեղակայված անձանց հետ, մասնավորապես՝ այն անձանց հետ, ում հետ նրանք ունեն ընդհանուր էթնիկ, մշակութային, լեզվական և կրոնական ինքնություն կամ ընդհանուր մշակութային ժառանգություն։
14. Հայ բնակչության կողմից անարգել տնտեսական և մարդասիրական օգնության ստացում դրսից»։
