Հայաստանի հատուկ հանձնարարություններով դեսպան Էդմոն Մարուքյանը գրառում է արել՝ հիշեցնելով, թե ինչ էր գրված 2020 թվականի նոյեմբերի 9-ի եռակողմկ հայտարարության մեջ, որը ստորագրել են ՀՀ վարչապետը, Ադրբեջանի նախագահն ու ՌԴ նախագահը։
«…..Լաչինի միջանցքը (5 կմ լայնություն), որը կապահովի կապը Լեռնային Ղարաբաղի և Հայաստանի միջև և միևնույն ժամանակ կշրջանցի Շուշի քաղաքը, կմնա Ռուսաստանի Դաշնության խաղաղապահ կոնտինգենտի վերահսկողության տակ։
Կողմերի միջև ձեռք բերված համաձայնությամբ առաջիկա երեք տարվա ընթացքում կորոշվի Լաչինի միջանցքի երկայնքով նոր երթուղու կառուցման ծրագիր, որը կապահովի Լեռնային Ղարաբաղի և Հայաստանի Հանրապետության միջև հաղորդակցությունը, որը պետք է վերահսկվի ռուսական խաղաղապահ կոնտինգենտի կողմից։
Ադրբեջանի Հանրապետությունը երաշխավորում է քաղաքացիների, տրանսպորտային միջոցների և բեռների անվտանգ տեղաշարժը Լաչինի միջանցքի երկայնքով երկու ուղղություններով:
Այս հայտարարությունը ցույց է տալիս, որ Լաչինի միջանցքը Լեռնային Ղարաբաղը Հայաստանի Հանրապետության հետ կապող միակ ճանապարհն է, որը համաձայնեցվել և ստորագրվել է Հայաստանի վարչապետի, Ադրբեջանի նախագահի և Ռուսաստանի Դաշնության նախագահի կողմից։
Լեռնային Ղարաբաղի ճգնաժամի լուծման առաջին քայլը 2020 թվականի նոյեմբերի 9-ից Եռակողմ հայտարարության 6-րդ հոդվածի իրականացումն է և 2023 թվականի փետրվար-հուլիս ամիսներին Արդարադատության միջազգային դատարանի միջանկյալ որոշման կատարումը։
Ադրբեջանը պետք է կատարի իր պարտավորությունները և դադարեցնի Լաչինի միջանցքի շրջափակումը»։
