«Ես չեմ կարծում, որ Ամերիկայի Միացյալ Նահանգները խափանում է ՄԱԿ-ի Անվտանգության խորհրդի կողմից բանաձևի ընդունման գործընթացը»,- Երևանում Բելգիայի Թագավորության ԱԳ նախարար Հաջա Լահբիբի հետ համատեղ ասուլիսում ասաց ՀՀ արտաքին գործերի նախարար Արարատ Միրզոյանը՝ պատասխանելով հարցին, որ ՄԱԿ ԱԽ քննարկումներից հետո մամուլում տեղեկություններ եղան, որ ԱՄՆ խոչընդոտում է բանաձևի ընդունմանը։
«Ես չեմ կարծում, որ Միացյալ Նահանգները պատրաստվում է, կամ կցանկանա մաս կազմել կամ նպաստել էթնիկ զտումների քաղաքականությանը: Մի քիչ դժվար եմ պատկերացնում»,- շարունակեց Միրզոյանը։
Նախարարը կարծում է և հուսով է, որ Միացյալ Նահանգներում շատ լավ հասկանում են ԼՂ-ում հումանիտար ճգնաժամի չափերը և ահագնացող տեմպերը.
«Հուսով եմ նաև, որ գիտակցում են՝ ՄԱԿ-ի ԱԽ-ի հնարավոր բանաձևը կգար օգնելու, հանգուցալուծելու այս իրավիճակը, վերջ տալ հումանիտար ճգնաժամին և կողմերին վերադարձնել բանակցությունների օրակարգին»։
