Ադրբեջանը համաձայն է միաժամանակ բացել Լաչինի և Աղդամի ճանապարհները. Հաջիզադե

Ադրբեջանի ԱԳՆ խոսնակ Այխան Հաջիզադեն անդրադարձել է Լաչինի միջանցքի շրջափակման, Աղդամ-Ասկերան ճանապարհի բացման և «Կարմիր խաչի» կոմիտեի (ԿԽՄԿ) բեռնատարների՝ ԼՂ մուտքի թեմաներին։

«Ինչ վերաբերում է Լաչին ճանապարհի և Աղդամ-Խանքենդի (Ստեփանակերտ) ճանապարհի միաժամանակյա օգտագործման հարցին, ինչպես Ադրբեջանը նշել է ԱՄՆ-ի և այլ գործընկերների հետ բարձր մակարդակի շփումների ժամանակ, Ադրբեջանը ԿԽՄԿ-ի միջնորդությամբ համաձայնել է այդ երկու ճանապարհի միաժամանակյա օգտագործմանը։

Ցավոք սրտի, այս համաձայնության իրականացմանը խոչընդոտում է Ղարաբաղի տարածաշրջանում Հայաստանի ստեղծած, այսպես կոչված, ռեժիմը։

Կրկնում ենք, որ ադրբեջանական կողմը պատրաստ է ԿԽՄԿ-ի միջնորդությամբ Աղդամ-Խանքենդի ճանապարհին զուգահեռ բեռների փոխադրման համար պայմաններ ստեղծել՝ Լաչինի սահմանային անցակետում սահմանային և մաքսային ընթացակարգերի պահպանմամբ», – հայտարարել է Հաջիզադեն։