«Մեղրիի երթուղու ստեղծումը կկապի Ադրբեջանի հիմնական տարածքը Նախիջևանի հետ». Գալուզին

ՌԴ ԱԳ փոխնախարար Գալուզինը մեկնաբանել է  հայ-ադրբեջանական տրանսպորտային և տնտեսական կապերի ապաշրջափակման վերաբերյալ հարցը․ «Այս հարցի շուրջ բանակցությունները փոխվարչապետների մակարդակով շարունակվում են արդեն երեք տարի։ Այս ուղղությամբ առաջընթաց կա՞»․ հարցրել է լրագրողը։ 

«Այս տարվա հունիսի 2-ին, երբ տեղի ունեցավ եռակողմ աշխատանքային խմբի վերջին հանդիպումը, կողմերը զգալի առաջընթաց արձանագրեցին տրանսպորտային հաղորդակցությունների ապաշրջափակման ուղով շարժվելու ուղղությամբ։ Հայաստանի և Ադրբեջանի միջև տրանսպորտային հաղորդակցությունների ապաշրջափակումը, մասնավորապես՝ Մեղրիի երթուղու ստեղծումը, Ադրբեջանի հիմնական տարածքը կկապի Նախիջևանի հետ։ Ի վերջո, խոսքը Հայաստանի տարածքով անցնող երկաթուղու մասին է, ուստի ես իրավունք եմ վերապահել ինձ՝ օգտագործել Մեղրիի երթուղի անվանումը։ Այո, Ադրբեջանում այն ​​կոչվում է Զանգեզուրի միջանցք։ Ասենք միայն, որ այս ձևակերպումը հարմար է բոլորին. մենք ակտիվորեն օգնում ենք մեր ադրբեջանցի և հայ գործընկերներին՝ համաձայնության գալ։ 

Կարծում ենք, որ այս համաձայնագիրը շատ կարևոր գործոն կլինի Անդրկովկասում ընդհանուր կայունացման համար։ Դա կնպաստի Անդրկովկասի բոլոր պետությունների տնտեսական զարգացմանը, քանի որ այս դեպքում Հայաստանը հնարավորություն կունենա դառնալ տրանսպորտային և լոգիստիկ հանգույց, ամրապնդել և ընդլայնել իր տրանսպորտային կապերը Ադրբեջանի, Թուրքիայի և Ռուսաստանի հետ։ Ադրբեջանը հնարավորություն կունենա անխափան ռիթմիկ տրանսպորտային կապեր ունենալ երկրի երկու հատվածների միջև։ Իսկ Անդրկովկասում իրավիճակի ընդհանուր կայունացումը ապագայի համար կծառայի Հայաստանի և Ադրբեջանի միջև վստահության հիմքերի ամրապնդմանը։ Այսպիսով, մենք հաստատակամ շարունակելու ենք խթանել այդ խորհրդակցությունները եռակողմ աշխատանքային խմբի շրջանակներում», -ասել է Գալուզինը։