Պուտինը մեկնաբանել է Ջո Բայդենի հայտարարությունը

ՌԴ նախագահ Վլադիմիր Պուտինը, մեկնաբանելով ԱՄՆ նախագահ Ջո Բայդենի խոսքերը ՌԴ առաջնորդին ճնշելու ցանկության մասին, ասել է, որ Միացյալ Նահանգները պետք է սովորի հարգել ուրիշներին և կարողանա փոխզիջումներ փնտրել, այդ դեպքում որևէ մեկին ճնշելու կարիք չի լինի։ Այս մասին Պուտինը հայտարարել է «Россия 24»-ին տված հարցազրույցում։

Ավելի վաղ Բայդենը, խոսելով երկրորդ ժամկետով հնարավոր վերընտրվելու իր նպատակների մասին՝ ասել էր, որ ծրագրում է միավորել Եվրոպան՝ Ռուսաստանի նախագահին «ճնշելու» համար։

«Մենք պետք է սովորենք հարգել ուրիշներին, և այդ ժամանակ որևէ մեկին ճնշելու կարիք չի լինի: Բայց ինչ-որ պատճառով կամ առանց որևէ պատճառի անընդհատ ճնշելու ցանկությունը հանգեցնում է խնդիրների: Նրանք իրենց յուրահատուկ փայլով արարողակարգային ժպտում են և բոլորի ուսերին թփթփացնում։ Բայց հարգանքն այլ մարդկանց, այլ երկրների, այլ ժողովուրդների նկատմամբ այլ բանի մեջ է, դա նրանց շահերը հաշվի առնելու մեջ է»,- ասել է Պուտինը։

Պուտինը նաև հիշեցրել է հայտնի ասացվածքը՝ «век живи-век учись»․ «Դա վերաբերում է ոչ միայն նախագահ Բայդենին, այլև ԱՄՆ քաղաքական վերնախավին ամբողջությամբ»։ 

Բացի այդ, Պուտինը նշել է, որ Բայդենն աշխարհի ամենափորձառու քաղաքական գործիչներից է իշխանության ամենաբարձր օղակներում անցկացրած ժամանակի առումով։ Նրա խոսքով՝ ԱՄՆ նախագահը գիտի, թե ինչ խնդիրներ պետք է դնել և ինչպես հասնել դրանց։

«Եթե Ռուսաստանի հետ հարաբերություններ կառուցելուց բացի այլ խնդիրներ չունեն, ապա ինչ-որ առումով դա վատ չէ»,- նշել է պետության ղեկավարը։