Լիտվայում տեղի են ունենում ռազմաօդային ուժերի զորավարժություններ` ՆԱՏՕ-ի օդուժի մասնակցությամբ

Լիտվայում տեղի են ունենում ռազմաօդային ուժերի վարժանքներ, որոնց մասնակցում են Լիտվայի Զոկնյայի ավիաբազայում տեղակայված ՆԱՏՕ-ի կործանիչները։

Այս մասին հաղորդում է ՏԱՍՍ-ը՝ վկայակոչելով Լիտվայի բանակի հրամանատարության հայտարարությունը։«Մինչև փետրվարի 2-ը Պանևեժիսի և Կլայպեդայի շրջանների տարածքները կլինեն Լիտվայի ռազմաօդային ուժերի և ՆԱՏՕ-ի օդուժի «Arsus vilkas» (խմբ․՝ «Կատաղի գայլ») զորավարժությունների գոտում», – ասված է հաղորդագրության մեջ։

Զորավարժություններին մասնակցում են Լիտվայի ռազմաօդային ուժերի ուղղաթիռները, ինչպես նաև ՆԱՏՕ-ի կործանիչները, որոնք չորս ամիս ռոտացիայով տեղակայված են Զոկնյայի ավիաբազայում և պարեկություն են իրականացնում բալթյան երեք երկրների երկնքում։ Բացի այդ, զորավարժությունների մասնակցում է MQ-9 Reaper հեռահար անօդաչու ինքնաթիռ:

«Միջազգային զորավարժությունների նպատակն է Լիտվայում տեղակայված ՆԱՏՕ-ի համահավաք գումարտակի ուժերի կողմից օդուժի կրակային օգնության և օդից հարձակումների իրականացման պլանավորման, համակարգման մշակումը», – նշել է հրամանատարությունը: