Եթե հայտնաբերվի մեղքի առկայությունը, կլինի նաև պատասխանատվություն. Մինասյան

Ազգային ժողովում արդարադատության նախարար Գրիգոր Մինասյանն անդրադարձել է Հռոմի ստատուտն ուժի մեջ մտնելուն և դրա շրջանակներում ադրբեջանցի ռազմական հանցագործների դեմ իրավական գործընթաց սկսելուն․

«7 օր է՝ Հռոմի ստատուտն ուժի մեջ է մտել, բայց 7 օր չէ, որ աշխատում ենք, այլ 2-3 ամիս մեր արդարադատության նախարարության մասնագետները, միջազգային իրավական հարցերով գրասենյակի աշխատողների հետ, պատրաստել են օրենսդրական փաթեթ, որի հիմքում ընկած է համապատասխանեցումը միջազգային ստանդարտներին և քրեական օրենսգրքի, քրեական դատավարության օրենսգրքի պահանջներին, որ մեզ բերելու է միջազգային քրեական արդարադատության ճիշտ դաշտ»,- ասել է նա։ Ըստ Մինասյանի՝ այդ միջազգային պայմանագիրը հնարավորություն է տալիս ռազմական հանցագործությունների բացահայտմանն ուղղված միջազգային գործիքակազմ ներառել օրենսդրության ու փորձի մեջ։  

«Հայաստան» խմբակցության պատգամավոր Արթուր Խաչատրյանի հարցին, թե անձամբ Իլհամ Ալիևի դեմ հայց ներկայացվելո՞ւ է, նախարարը պատասխանել է․ «Հենց նման միջազգային պայմանագրերի վավերացումը և ներգործումը պետական համակարգ ստիպում են թե՛ մեր, թե՛ հետագա կառավարություններին՝ գործել հենց միջազգային սկզբունքներին համապատասխան»,– և հավելել է` եթե հայտնաբերվի, ամրագրվի մեղքի առկայությունը, կոնվենցիայի շրջանակներում կլինի նաև պատասխանատվություն։