ՀՀ-ի ու Ադրբեջանի փոխվարչապետերի հանդիպման պայմանավորվածություն դեռ չկա

Հայաստանի փոխվարչապետ Մհեր Գրիգորյանը հայտարարել է, որ սահմանազատման և սահմանային անվտանգության հարցերով հայ-ադրբեջանական հանձնաժողովների հանդիպման վերաբերյալ դեռևս պայմանավորվածություն չկա։

Հարցին՝ ի՞նչ է քննարկվում այդ հանձնաժողովների հանդիպման ժամանակ, Գրիգորյանն ասել է.

«Ինքներդ էլ գիտեք՝ դելիմիտացիայի գործընթացն ինչ բարդ է։ Նախ, քարտեզ ասելով պետք է հասկանալ, որ խոսքը գնում է բացառապես տոպոգրաֆիկ քարտեզների մասին, որոնք պրոֆեսիոնալ քարտեզներ են։ Շատ դեպքերում շատ մարդիկ սխեմատիկ, մեթոդական քարտեզները շփոթում են տոպոգրաֆիկ քարտեզների հետ, որոնք այլ որակ ու այլ տրամաբանություն ունեն։ Բացի այդ, իրականության մեջ դելիմիտացիայի գործընթացը միայն քարտեզների հետ աշխատանքը չէ։

Այն նախ և առաջ իրավական հիմքի ու հենքի բացահայտումն է, որի վրա էլ կազմվել է այս կամ այն քարտեզը։ Ընդ որում, ամեն մարմին չէ, որ իրավունք է ունեցել քարտեզ կազմել կամ տպագրել։ Այս նյուանսները շատ կարևոր են և պետք է հասցեագրվեն մեր աշխատանքներում»,- մանրամասնել է նա։

Ըստ Գրիգորյանի՝ իրավական հենքի հետ կապված բարձր մակարդակի պայմանավորվածություններ կան. խոսքը Պրահայի և Սոչիի հանդիպումների մասին է, որտեղ հստակ հղում կա Ալմա Աթայի հռչակագրին.

«Դա նշանակում է, որ պետք է գործ ունենանք իդենտիֆիկացիայի՝ 1991թ. դեկտեմբերի դրությամբ սահմանի գիծը վերարտադրելու գործընթացի հետ»։

Գրիգորյանն անդրադարձել է նաև հանձնաժողովների վերջին հանդիպմանը, երբ քննարկած հարցերի բովանդակության մասին հավելյալ տեղեկություններ չտրվեցին.

«Ունենք համատեղ աշխատակարգ և ես շատ արդյունավետ եմ գնահատում այդ աշխատանքի ձևը։ Շատ զգայուն հարց ենք քննարկում միասին։ սահմանազատման հարցը ցանկացած պարագայում զգայուն հարց է։

Որպեսզի հարթակը հնարավորություն ունենա օբյեկտիվ ու կոնստրուկտիվ աշխատանքի, պայմանավորել ենք՝ հանդիպումների արդյունքում մեր հրապարակումները սահմանափակվում են այնքանով, որքանով համաձայնեցրել ենք համատեղ մամուլի հայտարարությունը»։

Նա «դիլետանտական», «նայիվ» է որակել մոտեցումը, թե հանձնաժողովները հանդիպում են իրար «ինչ-որ բան հանձնելու» համար.

«Որոշումների կայացման որոշակի, շատ որոշակի սահմանադրական ու օրենսդրական կարգեր ունենք, որոնցից չենք կարող շեղվել, և ասել, որ թաքուն են պահում, անիմաստ խոսակցություն է»։