Հանդիպել են ԵԽ գլխավոր քարտուղարի թեկնածու Ինդրեկ Սաարին

Եվրոպայի խորհրդի խորհրդարանական վեհաժողովում Հայաստանի Ազգային ժողովի պատվիրակության անդամներ Սոնա Ղազարյանը, Արուսյակ Ջուլհակյանը և Արմեն Գևորգյանը փետրվարի 27-ին հանդիպել են Եվրոպայի խորհրդի գլխավոր քարտուղարի ընտրություններում Էստոնիայի առաջադրած թեկնածու Ինդրեկ Սաարի հետ:

«Արմենպրես»-ին ՀՀ Ազգային ժողովից տեղեկացրել են, որ հյուրը հայ խորհրդարանականներին ներկայացրել է ԵԽ գլխավոր քարտուղարի գործունեության շրջանակում իր տեսլականը, առաջնահերթությունները:

Ըստ աղբյուրի՝ հանդիպմանը հայկական պատվիրակության անդամ Սոնա Ղազարյանն անդրադարձել է Հայաստանի առջև ծառացած անվտանգային մարտահրավերներին: Պատգամավորը խոսել է Ադրբեջանի հետ խաղաղության պայմանագրի շուրջ ընթացող գործընթացի մասին, մտահոգություն հայտնել Ադրբեջանի ագրեսիվ հռետորաբանության վտանգավորության վերաբերյալ, ինչը չի նպաստում խաղաղության հաստատմանը:

Արմեն Գևորգյանն անդրադարձել է Բաքվում պահվող հայ գերիներին և քաղաքացիական անձանց, կարևորել նրանց հայրենիք վերադարձը:

Արուսյակ Ջուլհակյանը խոսել է կառույցի անդամ պետությունների միջև ժողովրդավարական սկզբունքների վրա հիմնված բանակցությունների կարևորության մասին` այդ հարցում ընդգծելով կազմակերպության դերակատարությունը:

Թիվ 1