Ֆրանսիան մտադիր չէ զորք ուղարկել Ուկրաինա

«Ֆրանսիացիները չեն մեռնի Ուկրաինայի համար: Մենք զորք չենք ուղարկի մարտական ​​գործողություններ վարելու համար: Որոշվել է խանգարել Ռուսաստանին հաղթանակ տանել, ընդ որում՝ չկռվելով նրա դեմ: Այս շրջանակներում ոչինչ  բացառված չէ, ինչպեսև ասել է հանրապետության նախագահը», - հանրապետության արտաքին գործերի նախարար Ստեֆան Սեժուրնեի France Inter ռադիոկայանի եթերում արած այս հայտարարությունն է փոխանցել «Արմենպրես»-ը` վկայակոչելով ՏԱՍՍ-ին:

Փետրվարի 26-ին Ֆրանսիայի նախագահ Էմանուել Մակրոնը հայտարարել էր, որ Փարիզում կայացած հանդիպմանը, որտեղ մոտ 20 արևմտյան երկրների ներկայացուցիչներ քննարկել են Ուկրաինային հետագա աջակցությունը Ռուսաստանի դեմ հակամարտությունում, բարձրացվել է Ուկրաինա արևմտյան երկրների ցամաքային ուժերի հնարավոր ուղարկման թեման։ Նրա խոսքով՝ մասնակիցները փոխհամաձայնության չեն եկել այդ  հարցում, սակայն ապագայում նման սցենարը բացառել չի կարելի։

Խորհրդաժողովից հետո մասնակից երկրների մեծամասնության ներկայացուցիչները հայտարարել են, որ չեն ծրագրում զորք ուղարկել Ուկրաինա: