Հաստատակամ ենք Հայաստանի ժողովրդավար զարգացումն անշեղորեն երաշխավորելու հարցում. ՀՀ նախագահ

ՀՀ նախագահ Վահագն Խաչատուրյանը հարգանքի տուրք է մատուցել և ծաղիկներ խոնարհել Երևանի Գրիգոր Լուսավորիչ փողոցին հարակից այգում 2008 թ. մարտի 1-ի զոհերի հիշատակին կանգնեցված հուշարձանին։

Վահագն Խաչատուրյանը նաև ուղերձով դիմել է ՀՀ քաղաքացիներին.

«Սիրելի հայրենակիցներ, Հայաստանի Հանրապետության հարգելի քաղաքացիներ,

Այսօր լրանում է 2008 թվականի մարտի 1-ի ողբերգական իրադարձությունների 16-րդ տարելիցը, երբ օրվա իշխանությունը կրակեց իրենց իրավունքների համար պայքարող և խաղաղ ակցիաներ իրականացնող քաղաքացիների վրա:

Մարտի 1-ը, սակայն, իշխանության կողմից բիրտ ուժի կիրառման դրվագ չէր, այլ հետևանք տարիներ շարունակ մեր պետական համակարգում արմատավորված արատավոր, քրեաօլիգարխիկ բարքերի, քաղաքական հալածանքների մթնոլորտի, մարդու և քաղաքացու հիմնարար իրավունքների զանգվածային ու տևական ոտնահարման:

Մարտի 1-ի հանցագործությունը նաև հաստատումն էր այն բանի, որ օրվա իշխանությունն այլևս ձախողել էր կենսունակ ու մրցակցային քաղաքական համակարգի, կայուն պետական ինստիտուտների, ժողովրդավարական բարեփոխումների իրականացման կարևորագույն և պատասխանատու գործը:

Սիրելի հայրենակիցներ,

Այսօր՝ Մարտիմեկյան ողբերգությունից 16 տարի անց, մենք հաստատակամ ենք Հայաստանի ժողովրդավար զարգացումն անշեղորեն երաշխավորելու հարցում, որը բացառում է մեր քաղաքացիների ազատ կամարտահայտությունը և ժողովրդավարական սկզբունքների գերակայությունը վիճարկելու որևէ մտայնություն: Այսօր ոգեկոչելով մարտի մեկի անմեղ զոհերի հիշատակը` մենք վերահաստատում ենք մեր կամքը՝ կառուցել ազատ, ժողովրդավար ու զարգացող Հայաստան, որի համար իր քաղաքացիների կյանքն ու բարեկեցությունը գերագույն արժեք են»: