Կարգավորման համար եռակողմ հայտարարություններին այլընտրանք չկա․ Լավրով

Ռուսաստանի արտգործնախարար Սերգեյ Լավրովն Անթալիայի դիվանագիտական ​​ֆորումի արդյունքներով կայացած ասուլիսում հայտարարել է, որ Հայաստանի և Ադրբեջանի միջև կարգավորումը հնարավոր է բացառապես Ռուսաստանի, Ադրբեջանի և Հայաստանի եռակողմ հայտարարությունների հիման վրա` ընդգծելով, որ կարգավորման համար եռակողմ հայտարարություններին այլընտրանք չկա, հաղորդել է ՏԱՍՍ-ը:

Լավրովը նշել է նաև, որ Բաքվում հաստատում են իրենց պատրաստակամությունը բոլոր հարցերը լուծել Ռուսաստանի, Ադրբեջանի և Հայաստանի եռակողմ մի շարք հայտարարություններին համապատասխան:

ՌԴ ԱԳ ղեկավարը նաև հայտնել է, որ Մոսկվան պատրաստ է շարունակել աջակցությունը ինչպես տարածաշրջանում բոլոր հաղորդակցության ուղիների ապաշրջափակման, այնպես էլ սահմանազատման և, համապատասխանաբար, խաղաղության պայմանագրի նախապատրաստման հարցում։

Լավրովը հիշեցրել է, որ Ռուսաստանն այդ հարցի լուծմանը նպաստելու համար հատուկ հանձնարարություններով դեսպան է նշանակել, որն արդեն այցելել է Բաքու և նախատեսում էր այցելել Երևան։ «Երևանի մեր գործընկերները նրա այցը չհաստատեցին»,- ասել է Լավրովը:

Նա ընդգծել է նաև, որ Ռուսաստանը հետևում է Հայաստանի ղեկավարության հայտարարություններին և, դրանք հաշվի առնելով, կծրագրի սեփական գործնական քայլերը: