Փոխադարձ գնդակոծություններ

Ռուսաստանի Բելգորոդի մարզի նավթաբազայում պայթյունի հետևանքով վնասվել է մեկ նավթամբար, «Արմենպրես»-ի փոխանցմամբ՝ Telegram-ում գրել է Արտակարգ իրավիճակների նախարարության Բելգորոդի մարզի վարչությունը։

«Վնասվել է մեկ նավթամբար, կրակի տարածման սպառնալիք չկա, ուժերը և միջոցները բավարար են։ Տուժածներ չկան», – նշված է հաղորդագրությունում։

Ըստ ԶԼՄ-ների՝ «Բելգորոդնևտեպրոդուկտ» ընկերության տարածքում հրդեհի պատճառը եղել է ուկրաինական անօդաչու թռչող սարքի հարձակումը։

Բելգորոդի շրջանի Գուբկինսկի և Ստարոոսկոլսկի շրջաններում հրթիռային հարձակման վտանգ էր հայտարարվել, որն այնուհետև չեղարկվել էր։

Ավելի ուշ Արտակարգ իրավիճակների նախարարության Բելգորոդի մարզի վարչությունը մեկ այլ հաղորդագրություն է տարածել՝ հայտարարելով Շեբեկինո քաղաքի գնդակոծության մասին։

«Շեբեկինո քաղաքը գնդակոծվում է։ Իջե՛ք նկուղ (ապաստարան)», – գրված է հաղորդագրությունում։

Իր հերթին ուկրաինական կողմը հայտարարել է գիշերն Օդեսայի վրա ԱԹՍ-ների հարձակման մասին։ Ըստ Ուկրաինայի հարավի պաշտպանության ուժերի՝ 18 ԱԹՍ խոցվել է, սակայն 4 ԱԹՍ-ներ հարվածել են թիրախներին․ տուժածներ չկան։ Վնասվել են չգործող առողջարանական հաստատություն և մասնավոր տուն։