ՄԱԿ-ը ցամաքային նոր ուղիով օգնություն է հասցրել Գազայի հյուսիս

ՄԱԿ-ը հայտնել է, որ վերջին երեք շաբաթվա ընթացքում դեպի Գազայի հատվածի հյուսիս առաջին անգամ սնունդ մատակարարելու համար օգտագործվել է ցամաքային նոր ճանապարհ, «Արմենպրես»-ի փոխանցմամբ՝ հաղորդել է BBC-ն։

Իսրայելի զինվորականները հայտնել են, որ Պարենի համաշխարհային ծրագրի վեց բեռնատարներ անցել են Գազայի սահմանային դարպասներից մեկով։ Ըստ ՄԱԿ-ի՝ Պարենի համաշխարհային ծրագրի ավտոշարասյունն օգտագործել է իսրայելցիների զինվորական ճանապարհը, որն անցնում է Գազայի սահմանային ցանկապատի երկայնքով։ Ավտոշարասյունը Գազա քաղաք է հասցրել սնունդ 25 հազար մարդու համար։

Բեռնատարները նախապես ստուգել են իսրայելցի զինվորականները։

Իսկ Կիպրոսից մարտի 12-ին դուրս է եկել 200 տոննա սննդով բեռնված նավ, որով բացվում է պաղեստինյան տարածք հումանիտար օգնություն հասցնելու նոր ծովային միջանցք։ Նավը Գազայի հատված կհասնի մարտի 14-ին։ Այնուամենայնիվ, BBC-ն շեշտել է, որ օգնության մատակարարման ամենաարագ ուղին ցամաքային փոխադրումներն են։  

Ըստ ՄԱԿ-ի՝ Գազայի հատվածում առնվազն 576 հազար մարդ՝ բնակչության մեկ քառորդը, սովամահության եզրին է։ Գազայի առողջապահական իշխանությունները հայտնել են, որ հիվանդանոցներում սովից և ջրազրկումից մահացել է առնվազն 27 մարդ, մեծ մասը` երեխա։

Պաղեստինյան անկլավի առողջապահական իշխանությունների վերջին տվյալներով՝ Գազայի հատվածում իսրայելական ուժերի ռազմական գործողության մեկնարկից ի վեր սպանված պաղեստինցիների թիվը մոտենում է 31 հազար 200-ի: