«Կա որոշակի սահմանագիծ, բայց սահմանազատման հանձնաժողովները պետք է հասկանան, թե որ քարտեզով են աշխատում․ այսինքն` այն իրավական հիմքը, որով այդ գիծը հստակ կգծվի: Երկու կողմի համար ընդունելի ինչ-որ իրավական քարտեզ պետք է վերցնել, որն էլ կհանդիսանա այդ գործընթացի համար հիմք, դրանով կլինի և՛ կաբինետային, և՛ դաշտային աշխատանք»,- լրագրողների հետ ճեպազրույցում ասել է ՏԿԵ նախարար Գնել Սանոսյանը՝ պատասխանելով հարցին, թե ինչ է լինելու 4 գյուղերի հետ, եթե դելիմիտացիան սկսվի Տավուշից։
Նախարարի խոսքով՝ այդ տարածքները 29.800-ի՝ Հայաստանի վարչատարածքային բաժանման մեջ չեն մտնում։ Հարցին՝ եթե դեռ հանձնաժողովների աշխատանքներն ավարտված չեն, ինչո՞ւ է վարչապետը շտապում հայտարարել, որ այդ 4 գյուղերը Հայաստանի տարածքում չեն, Սանոսյանն ասել է, որ ինչքան էլ աշխատանքները դեռ ավարտված չեն, բայց կան որոշակի քարտեզներ, որոնցում ինչ-որ բան երևում է։
