Եվրախորհրդարանի այսօրվա նիստում քվեարկության է դրված ԵՄ-ի և Հայաստանի կապերի մերձեցման, Ադրբեջանի և Հայաստանի միջև խաղաղության համաձայնագրի վերաբերյալ բանաձև։
Բանաձևը ներկայացրել է Եվրոպայի ժողովրդական կուսակցության պատգամավորական խումբը։ Բանաձևի կետերից մեկում Եվրախորհրդարանի պատգամավորները առաջարկում են քննարկել ԵՄ-Հայաստան ավելի սերտ համագործակցության, ընդհուպ՝ անդամակցության հնարավոր հեռանկարները։
Բանաձևի այդ կետում, մասնավորապես, ասվում է. «Եվրոպական միության պայմանագրի 49-րդ հոդվածի համաձայն՝ ցանկացած եվրոպական պետություն կարող է դիմել Եվրամիության անդամ դառնալու համար՝ պայմանով, որ հավատարիմ է Կոպենհագենի չափանիշներին և ժողովրդավարության սկզբունքներին, հարգում է հիմնարար ազատությունները, մարդու և փոքրամասնությունների իրավունքները և պաշտպանում է օրենքի գերակայությունը։ Եթե Հայաստանը շահագրգռված լինի թեկնածուի կարգավիճակ ստանալ և շարունակի իր ժողովրդավարությունը ամրապնդող կայուն բարեփոխումների ճանապարհը, դա կարող է հիմք հանդիսանալ ԵՄ-Հայաստան հարաբերություններում փոխակերպման փուլի համար։ Կոչ ենք անում Հանձնաժողովին և Խորհրդին՝ ակտիվորեն աջակցել ԵՄ-ի հետ համագործակցության ընդլայնման Հայաստանի ցանկությանը ոչ միայն տնտեսական գործընկերության, այլ նաև քաղաքական երկխոսության, մարդկանց միջև շփումների, ոլորտային ինտեգրման և անվտանգության ասպարեզում համագործակցության ոլորտում», – ասված է բանաձևի մեջ։
