Ստորություն եմ համարում կինոկենտրոնի ղեկավարի ու հանձնաժողովի որոշ անդամների վարքը․ Հովհաննես Գալստյան

Կինոռեժիսոր Հովհաննես Գալստյանը ֆեյսբուքյան իր էջում գրում է․

Պաշտպանում եմ Իննա Սահակյանի ազատ ստեղխագործելու իրավունքը: Ինձ միևնույն է ինչի մասին է նկարում իմ կոլեգան, ստեղծագործողը ազատ է արտահայտելու իր հույզերը, մտքերն ու աշխարհընկալումը՝ իրեն շնորհված ունակությունների ու տաղանդի չափով: Ֆիլմերը գնահատվում են ըստ գեղարվեստական և արտադրական չափորոշիչների, բացառապես ու միայն, ցանկացած այլ միջամտություն բռնություն է արվեստի ու ազատ ստեղծագործելու իրավունքի հանդեպ:

Միևնույն ժամանակ, ես ստորություն եմ համարում կինոկենտրոնի ղեկավարի ու հանձնաժողովի որոշ անդամների վարքը, որոնք, հիշեցնեմ, ՀՀ Օրենսդրության կոպտագույն խախտումով փակեցին միջազգային համաֆինանսավորմամբ, անթերի արտադրական սխեմայով, բացառապես ազգային արժեքների հենքի վրա ստեղծվող «Տատիկիս վարսերը» ֆիլմի ֆինանսավորումը, հիմք ընդունելով այլ անավարտ ֆիլմի առկայության փաստը, իսկ հիմա հղում անելով նույն միջազգային համաֆինանսավորմանը, հաստատում են նոր ֆիլմի ֆինանսավորում՝ արտադրության մեջ անավարտ ֆիլմ ունեցող ընկերության համար: Այսինքն, այն ինչ չէր կարելի Պարալլելս Ֆիլմպրոդաքշն ընկերությանը, ըստ խոդիկյան կարինեի նմանների, կարելի է յուրայիններին: Սա կինոկենտրոնի ու հանձնաժողովականների կողմից օրենքը իրենց տակ ծալելու հերթական լկտի դրսևորումն է, ինչի համար սրանք, կասկած չունենան, կանգնելու են դատարանի առաջ:

Իննան ազատ է նկարելու իր ֆիլմը, եթե ՀՀ օրենքը չի արգելում նկարել, իսկ կինոկենտրոնը՝ անգրագիտության ու կոռուպցիայի մեջ թաղված ամենաանհեթեթ ՀՀ պետական կառույցը, պետք է օր առաջ հայտնվի քննչական մամինների ուշադրության կենտրոնում՝ պետական գումարները վատնելու ու անորակ կառավարման համար: Ուղղակի նայեք այս և նախորդ երեք տարիներին կինոկենտրոնի կողմից պետական ֆինանսավորում ստացած ֆիլմերի փառատոներում և շուկայում գրանցած ողբերգական արդյունքները ու եզրակացություն արեք: