Սա էական ձեռքբերում է նաև Հայաստանի համար. վարչապետ

Սա ձեռքբերում է և Ադրբեջանի համար, բայց ես ուզում եմ նաև ընդգծել, որ սա էական ձեռքբերում է նաև Հայաստանի համար:

Հայաստանն ու Ադրբեջանը երկկողմանի ստորագրություններով հաստատեցին միմյանց տարածքային ամբողջականության ճանաչումը:

Հաստատեցին, որ սահմանազատման գործընթացում ոչ թե նոր սահման է ստեղծվելու, այլ վերարտադրվելու է ԽՍՀՄ փլուզման պահին դե յուրե իրավական նշանակություն ունեցող սահմանը:

Այս մասին լրագրողների հետ զրույցում ասել է ՀՀ վարչապետ Նիկոլ Փաշինյանը։

Նրա խոսքով, պայմանավորվել են սահմանի այս հատվածի վերաբերյալ, բայց նաև հիմնարար սկզբունք են որդեգրել սահմանազատման հետագա ողջ գործընթացի համար, ինչը նշանակում է, որ արդեն ձեռք բերված պայմանավորվածությունների համաձայն կարող են նստել և բոլոր վիճահարույց հարցերը բանակցային սեղանի շուրջ լուծել։

«Կիրանցում և Ոսկեպարում ասել եմ, որ եթե հանկարծ սահմանազատման գործընթացում կպարզվի, որ ինչ-որ տների, հողամասերի հետ կապված խնդիր կա, մեր բոլոր քաղաքացիների իրավունքներին տեր կկանգնենք: Որտեղ անհրաժեշտ կլինեն այլ լուծումներ, նույն բնակավայրում նոր տներ կկառուցենք»,- ասել է Նիկոլ Փաշինյանը։