Հայաստանը դեմ է ռուսական սահմանապահ ծառայությանը, բայց դա իրենք են ստորագրել և պետք է հարգեն սեփական ստորագրությունը. Ալիև

Ալիևը խոսել է հայ-ադրբեջանական բանակցություններից, տարածաշրջանային հաղորդակցությունից ու Ադրբեջան-Նախիջևան կապից։ 

«Հայաստանը չի կատարում նոյեմբերի 9-ի հայտարարությամբ իր ստորագրած պարտավորությունները, չի տրամադրում ճանապարհ Նախիջևանին միանալու համար, որը, համաձայն հայտարարության, պետք է վերահսկվի ՌԴ սահմանապահ ծառայության կողմից։ Հիմա այդ գործընթացը փակուղում է։ Մենք այլընտրանքային ճանապարհի կառուցում ենք սկսել Արաքսի հարավով՝ Իրանի տարածքով։ Որպես հետևանք՝ Հայաստանը կկորցնի իր հնարավորությունը։ 

Նրանք ցանկանում են խաղաղության խաչմերուկ դառնալ, բայց պետք է նախևառաջ համաձայնության գան մեզ հետ, առանց դրա այն կլինի թղթի անիմաստ կտոր։ Ցավոք, նրանք փորձում են դա քննարկել տարածաշրջանից հեռու գտնվող երկրների հետ, բայց եթե ցանկանում են դա կյանքի կոչել, պետք է այն քննարկեն մեզ հետ։ Եռակողմ հայտարարությունը պետք է հարգվի, և Ադրբեջանը պետք է կապ ունենա Նախիջևանի հետ՝ միջազգային վերահսկողությամբ ու անվտանգությամբ։ Նրանք դեմ են ռուսական սահմանապահ ծառայությանը, բայց դա իրենք են ստորագրել և պետք է հարգեն սեփական ստորագրությունը։ Նրանք կկորցնեն տրանզիտ երկիր դառնալու հնարավորությունը, որովհետև բոլոր այս սպեկուլյացիաները «խաղաղության խաչմերուկի» մասին՝ առանց Ադրբեջանի, անհնար են ու անիրական», – ասել է Ալիևը։