Ինչ է պահանջվում բռնագանձել Գագիկ Ծառուկյանից (տեսանյութ)

Գլխավոր դատախազ Աննա Վարդապետյանը Ազգային ժողովում՝ Դատախազության 2023 թվականի գործունեության հաղորդման քննարկման ժամանակ, մանրամասնել է, թե Գլխավոր դատախազությունն ինչ է պահանջում բռնագանձել նախկին պատգամավոր, «Բարգավաճ Հայաստան» կուսակցության առաջնորդ Գագիկ Ծառուկյանից և նրան փոխկապակցված անձանցից:

Ըստ նրա՝ մասնավորապես պահանջվում է հօգուտ Հայաստանի Ծառուկյանից բռնագանձել 79 անշարժ գույք, 42 տրանսպորտային միջոց, չնույնականացված 8 տրանսպորտային միջոցների ձեռքբերման արժեք՝ 349 միլիոն դրամի չափով, զիջված պահանջի իրավունքի գումար՝ շուրջ 33,5 միլիոն դրամի չափով:

Բացի այդ, դատախազությունը պահանջում է, որ Գագիկ Ծառուկյանից բռնագանձվի 10 անշարժ գույքի շուկայական արժեք, 39 իրավաբանական անձում բաժնեմաս ու բաժնետոմս, ավելի քան 63,3 միլիարդ դրամին համարժեք փոխառությունների պահանջի իրավունք, 12 ֆիզիկական ու իրավաբանական անձանց տրամադրված փոխառությունների գումարի չափ ավելի քան 16,8 միլիարդ դրամին համարժեք ու ավելի քան 86 միլիարդ 480 միլիոն դրամի բռնագանձման պահանջ, որը ապօրինի ծագում ունեցող գույքի օգտագործումից ստացված եկամուտների ու օրինական եկամուտներով չհիմնավորվող վճարումների, փոխանցումների ու այլ ելքերի հանրագումարն է:

Առավել մանրամասն՝ տեսանյութում: