Հայաստան-Վրաստան միջպետական ճանապարհի Դիլիջան-Իջևան հատվածում, որտեղ հեղեղումների հետևանքով փլուզում է եղել, ամրաշինական աշխատանքներ են իրականացվում։ «Արմենպրես»-ի փոխանցմամբ՝ այս տեղեկությունը «Ֆեյսբուք»-ի իր էջում հայտնել է ՀՀ ԱԺ փոխնախագահ Հակոբ Արշակյանը։
«Այս պահին աղետի գոտում ենք ՀՀ Տավուշի մարզպետ Հայկ Ղալումյանի, ՀՀ ԱԺ ՏՏԿԳՇԻ հանձնաժողովի նախագահ Վահե Ղալումյանի, ՀՀ ՏԿԵՆ ճանապարհային դեպարտամենտի տնօրեն Գոռ Ավետիսյանի հետ։
Ամրաշինական աշխատանք է տարվում միջպետական ճանապարհի Դիլիջան֊Իջևան հատվածում։
Ճանապարհը փակ է երթևեկության համար, և դեպի Իջևան ուղևորվող քաղաքացիներին անհրաժեշտ է օգտագործել Ճամբարակով անցնող երթուղին»,- գրել է Արշակյանը։
