Ֆրանսիայի արտահերթ ընտրություններին ռեկորդային թվով ընտրողներ են մասնակցում

Ֆրանսիայի արտահերթ խորհրդարանական ընտրություններում ռեկորդային ակտիվություն է նկատվում։ Այդ մասին հայտնել են երկրի ՆԳՆ-ից։

«Ժամը 12-ի դրությամբ մասնակցությունը կազմել է 25,9 տոկոս»,- պարզաբանել են վարչությունից։

Ինչպես հայտնում է Financial times-ը, սա ամենաբարձր մասնակցությունն է ավելի քան չորս տասնամյակների ընթացքում։

Ընտրողների մասնակցությունը կարևոր գործոն է այս ընտրություններում։

Պայքարն ընթանում է երեք հիմնական դաշինքների միջև, որոնցից յուրաքանչյուրը զգալի աջակցություն է վայելում քաղաքացիների կողմից։

Հունիսի 9-ին Ֆրանսիայում Եվրախորհրդարանի ընտրություններում աջակողմյան «Ազգային հանրահավաք» կուսակցությունը ավելի քան երկու անգամ առաջ է անցել Մակրոնի կողմնակիցների կոալիցիայից՝ հավաքելով ձայների 31,36 տոկոսը։ Դրանից հետո Մակրոնը հայտարարեց Ազգային ժողովը, Ֆրանսիայի խորհրդարանի ստորին պալատը ցրելու և արտահերթ խորհրդարանական ընտրությունները երկու փուլով՝ հունիսի 30-ին և հուլիսի 7-ին անցկացնելու մասին։