Ուկրաինայի նախագահ Վլադիմիր Զելենսկին հաստատել է, որ Ուկրաինան բանակցություններ է վարում Ադրբեջանից Եվրամիություն բնական գազի մատակարարման շուրջ, որպեսզի պահպանի իր դերը որպես տարանցիկ երկիր և օգնի արևմտյան հարևաններին ապահովել էներգետիկ անվտանգությունը։ Այս մասին գրում է Bloomberg-ը՝ մանրամասնելով, որ ռուսական գազը շարունակում է հոսել Ուկրաինայի տարածքով անցնող խողովակաշարով՝ չնայած պատերազմին: Գազի տարանցման գործարքի ժամկետը կլրանա 2024 թվականի վերջին, ինչն առաջացնում է վառելիքի մատակարարման շուրջ մտահոգություններ:
Ռուսական գազն ադրբեջանականով փոխարինելու պայմանագիրը «այժմ քննարկվող առաջարկներից մեկն է», ասել է Զելենսկին Bloomberg-ին տված հարցազրույցում։
Այժմ, ըստ նախագահի, «նախարարների կաբինետի անդամները դրանով են զբաղված»։
Bloomberg գործակալությունը հունիսին հայտնել էր, որ եվրոպացի պաշտոնյաները քննարկում են Ուկրաինայի տարածքով գազի մատակարարումները շարունակելու հարցը։
Զելենսկին ընդգծել է, որ Ուկրաինան չի ցանկանում երկարաձգել Ռուսաստանի Դաշնության հետ գազային պայմանագիրը։«Մենք չենք ուզում, որ նրանք այստեղ փող աշխատեն», – ասել է Զելենսկին։
