Բրիտանական թանգարանում պահվող Անահիտ աստվածուհու քանդակը կցուցադրվի Հայաստանի պատմության թանգարանում։ Կառավարությունը 15,6 մլն դրամ հատկացրեց ԿԳՄՍ-ին։
Նախարար Ժաննա Անդրեասյանը հայտնեց, որ գումարը հատկացվում է «Մայր աստվածություն․ Անահիտից Մարիամ» ժամանակավոր ցուցադրության հանրահռչակման համար։
Ակնկալվում է, որ ցուցադրության վեց ամսվա ընթացքում թանգարանը կունենա նվազագույնը 300 հազար այցելու, իսկ հանրահռչակման արդյունքում՝ 800․000-1․000․000 մարդ տեղեկացված կլինի ցուցահանդեսի մասին:
Քանդակի տեղափոխման հետ կապված հարցին ի պատասխան՝ Անդրեասյանն ասաց, որ պայմանները մանրամասն նկարագրված է Բրիտանական թանգարանի հետ կնքված պայմանագրում։
Ցուցահանդեսի բացումը նախատեսված է 2024 թվականի սեպտեմբերի 21-ին՝ Հայաստանի Հանրապետության անկախության օրվա տոնական միջոցառումների շրջանակում։
