Հայաստանի ֆուտբոլի ազգային հավաքականի ավագ Հենրիխ Մխիթարյանին «Արսենալ»-ում խանգարել են իսպանացի մարզիչ Ունաի Էմերիի մոտեցումները: Կիսապաշտպանն այդ մասին ասել է հեղինակավոր «FourFourTwo» պարբերականին տված հարցազրույցում: Նա նշել է, որ Էմերիի՝ «Արսենալ»-ը գլխավորելուց հետո իր դերը թիմում փոխվել է եւ բացատրել է՝ ինչու է տեղափոխվել «Ռոմա»:
«Նա ավելի մեծ ուշադրություն էր դարձնում տակտիկային, եւ հետեւաբար իմ դերը փոխվել էր: Ես խաղում էի որպես վինգեր, պետք է խաղը կառուցեի պաշտպանողական ոճի կիսապաշտպանի հետ: Այդ պատճառով չէի կարողանում ավելի շատ գոլեր խփել ու գոլային փոխանցումներ անել: Ես ցանկանում եմ ազատ տեղաշարժ ունենալ խաղադաշտում, բայց դու պետք է անես այն, ինչ ասում է մարզիչը: Ես չէի կարող ընդունել, որ որոշ խաղերում պետք է նստեմ պահեստայինների նստարանին: Ես գիտեմ իմ որակները եւ ինչ կարող եմ անել: Ես 30 տարեկան եմ եւ սիրում եմ ֆուտբոլ խաղալ, ոչ թե պարզապես նստել պահեստայինների նստարանին ու ժամանակ վատնել: Էմերին ու մարզական տնօրենը վստահեցնում էին, որ ես կարեւոր եմ «Արսենալ»-ի համար, սակայն պայմանագիր կնքեցի «Ռոմա»-ի հետ, քանի որ նրանք ինձ ավելի շատ են հավատում»,- ասել է նա:
Մխիթարյանը «Ռոմա»-ում հանդես է գալիս վարձավճարով: Նրա պայմանագիրը նախատեսված է մինչեւ ընթացիկ՝ 2019-20, մրցաշրջանի ավարտը: Այս շրջանում նա ապաքինվում է աճուկային վնասվածքից: Արդեն մարզվում է թիմի ընդհանուր խմբում:
