Հնդկաստանի հյուսիսում տասնյակ մարդիկ հորդառատ անձրևների զոհ են դարձել

Հնդկաստանի հյուսիսում հորդառատ անձրևների զոհ է դարձել ավելի քան 30 մարդ, չորս նահանգում առնվազն ութ մարդ անհետ կորել է, հայտնում է The Times of India-ն։

Հանգստյան օրերին ինտենսիվ տեղումներ են դիտվել հյուսիսային Փենջաբ, Ուտար Պրադեշ, Հիմաչալ Պրադեշ և Ռաջաստան նահանգներում:

Փենջաբում ընտանիքի 12 անդամներ տեղափոխող ավտոմեքենան գետն է ընկել, ինչի հետևանքով ինը ուղևորներ զոհվել են:

Բհարատպուրում Բանգանգա գետի մոտ յոթ երիտասարդ սոցիալական ցանցերի համար լուսանկարներ անելիս են եղել, երբ սողանքի հետևանքով գետինը փլվել է: Բոլորը մահացել են։

Ջհունջհունու քաղաքում երեք երիտասարդ խրվել է անձրևից առաջացած լճակի ցեխի մեջ և խեղդվել:

Կարաուլիի շրջանում ռեկորդային 380 մմ տեղումներ են գրանցվել: Հայրը և նրա 10-ամյա որդին զոհվել են տան փլուզման հետևանքով:

Հնդկաստանի տարբեր շրջաններում հորդառատ անձրևները կամուրջների, ճանապարհների ու շինությունների ավերման պատճառ են դարձել։