Հայկական կոնյակների գրեթե 90%-ը, որ ներկայացվել է ռուսական խանութներում, պարզվել է՝ անվտանգ չէ, իսկ արտադրանքի մոտ կեսը պարունակում է սպիրտներ, որոնք կապ չունեն խաղողի հետ։ Այս մասին, ինչպես հաղորդում է ՏԱՍՍ-ը, ասված է «Անտիկոնտրաֆակտ» միջազգային ասոցիացիայի և Կոնյակի, սպիրտի և ալկոհոլային արտադրանք արտադրողների միության համատեղ հետազոտության մեջ։
Հետազոտության շրջանակներում ձեռք է բերվել կոնյակի 200 նմուշ ավելի քան 20 ապրանքանիշներից, որոնք ներկայացնում են հայկական 10 խոշորագույն արտադրողներ։
Ապրանքները ձեռք են բերվել ռուսական տարբեր դաշնային առևտրային ցանցերից և ուղարկվել վերլուծության Գարեջրագործության, ոչ ալկոհոլային և գինեգործական արդյունաբերության համառուսաստանյան գիտահետազոտական ինստիտուտի անկախ լաբորատորիա:
Փորձարկման արդյունքներով՝ խախտումներ են հայտնաբերվել 177 նմուշներում, ինչը կազմում է ընդհանուր քանակի 89%-ը։
Դեպքերի գրեթե կեսում հայտնաբերվել է խաղողի հետ կապ չունեցող սպիրտ, ինչը հակասում է կոնյակի ստանդարտներին։ Միայն 23 նմուշ է լիովին համապատասխանել միջպետական ստանդարտներին և Ռուսաստանի Դաշնության օրենսդրությանը:
Այս կապակցությամբ «Անտիկոնտրաֆակտ» ասոցիացիան դիմել է Գլխավոր դատախազությանը, Դաշնային մաքսային ծառայությանը և «Ռոսալկոհոլտաբակկոնտրոլ»-ին՝ խնդրելով ուժեղացնել հսկողությունը Հայաստանից ալկոհոլային խմիչքների ներմուծման նկատմամբ՝ հաշվի առնելով, որ դրանք անցնում են Վրաստանի տարածքով, և սահմանափակել ապրանքների շրջանառությունը, որոնք չեն համապատասխանում որակի ստանդարտներին:
Նամակներում նշվում է նաև, որ Հայաստանից կեղծված ապրանքները ստեղծում են անբարեխիղճ մրցակցություն և գների դեմպինգ, ինչը դժվար կացության մեջ է դնում ռուս արտադրողներին, որոնց սպառնում է շուկայից դուրսմղում:
«Անտիկոնտրաֆակտ» ասոցիացիայի գլխավոր տնօրեն Քրիստինա Սկրիպնիկը նշել է, որ հետազոտության արդյունքները ցնցել են մասնագետներին։ Պարզվել է, որ նույնիսկ նույն ապրանքանիշի արտադրանքի գնումը չի երաշխավորում կեղծման բացակայությունը, քանի որ նույն ապրանքանիշի նմուշները կարող են պարունակել տարբեր տեսակի սպիրտ՝ կախված շշալցման ամսաթվից։
