ՌԴ ԱԳ նախարարն անդրադարձել է Մոսկվա-Կիև հնարավոր բանակցություններին, հայտարարել՝ Կուրսկի շրջանի վրա հարձակումից հետո Ուկրաինայի հետ բանակցությունների մասին խոսք լինել չի կարող։
«Վլադիմիր Պուտինը մի շատ կարևոր արտահայտություն է արել, այն է՝ մենք որոշ ժամանակ անց գնահատական կտանք ստեղծված իրավիճակին»,- հավելել է Սերգեյ Լավրովը։
Պուտինի օգնական Յուրի Ուշակովն էլ հայտարարել է, որ չնայած սահմանամերձ տարածքներում ուկրաինական կողմի գործողություններին՝ հակամարտության կարգավորման վերաբերյալ Մոսկվայի առաջարկները դեռ ուժի մեջ են:
Ավելի վաղ Ռուսաստանի նախագահը ռազմական գործողությունների դադարեցման նոր պայմաններ էր առաջ քաշել՝ ուկրաինական զորքերի դուրս բերում Դոնեցկից, Լուգանսկից, Խերսոնի և Զապորոժիեի շրջանների ամբողջ տարածքից:
Նաև, Կիևը պետք է հրաժարվի ՆԱՏՕ-ին անդամակցության մտադրությունից, հայտարարի չեզոք, ոչ միջուկային կարգավիճակ, ապառազմականացվի և ապազգայնականացվի, Արևմուտքի հակառուսական պատժամիջոցներն էլ պետք է չեղարկվեն, Ղրիմը և Սևաստոպոլը ճանաչվեն Ռուսաստանի մաս:
Կիևը և նրա արևմտյան դաշնակիցներն անիրատեսական վերջնագիր են որակում Մոսկվայի պահանջները:
