«Իրենք մարդատյաց են, Մելը՝ ոչ: Վկա՝ իրենց հայտարարությունը». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրառում է կատարել.

«Նա պարզապես չի կարող լինել մեզանից մեկը»,-գրված է մարզական մի քանի ֆեդերացիաների եւ որոշ մարզիկների հայտարարության մեջ: Խոսքն էլ Մել Դալուզյանի մասին է: Հայտարարությունը կարդացած կլինեք, մեջբերելը ժամանակի կորուստ է, բայց մի բանում դրա հեղինակների հետ համաձայն եմ. Մել Դալուզյանը չի կարող լինել նրանցից մեկը: Ասեմ՝ ինչու:
Իրենք մարդատյաց են, Մելը՝ ոչ: Վկա՝ իրենց հայտարարությունը:
Իրենք մեծամիտ են, Մելը՝ ոչ: Վկա՝ իրենց հայտարարությունը:
Իրենք ստրկամիտ են, Մելը՝ ոչ: Վկա՝ իրենց հայտարարությունը, որը, ըստ ինձ հասած տեղեկությունների, արվել է Գագիկ Ծառուկյանի հորդորի թե հարկադրանքի (մեծ հաշվով այս դեպքում տարբերություն չկա) արդյունքում:
Եվ վերջապես, եթե որեւէ մեկը խայտառակում է «հայկական մարզաշխարհի անունը», ապա դա հենց այդ խայտառակ, ամոթալի հայտարարության հեղինակներն են: Այս մարդիկ անգամ չգիտեն, թե ինչի է կոչված սպորտը, թե հումանիզմի ինչ ցուցիչ է մարզական աշխարհն ընդհանրապես: Այս մարդիկ չգիտեն, որ սպորտը քարոզում է սեր, բարություն, եւ այստեղ ուժը կոչված է ծառայելու միմիայն մեծ մարդասիրությանը: Մարդիկ հեշտությամբ տրորում են իրենց նման մեկին, նրա նկատմամբ ակնհայտորեն արհամարհանք քարոզում: Ուրեմն ի՞նչ արհամարհանքի են արժանի հենց իրենք: