«Մարզերի համար պետք է էլեկտրական շարժիչով օդանավեր ներդնենք». վարչապետ

ՀՀ վարչապետ Նիկոլ Փաշինյանը Ջերմուկում խոսել է էլեկտրական շարժիչներով օդանավերի աշխատանքի մասին։ Նա կարևորել է միջմարզային փոխադրումների նպատակով այդպիսի օդանավեր ներդնելը. «Վստահ եմ՝ եթե ոչ հիմա, մի քանի տարուց սկսելու է սերիական արտադրություն։ 10-12 տեղանոց են»,– ասել է նա՝ հավելելով, որ Հայաստանում նման օդանավերի բում է սպասվում. «էլեկտրական ինքնաթիռներին 50 մետր է պետք՝ թռիչքի, և 30 մետր՝ վայրէջքի համար»։

Վարչապետը հանձնարարել է համապատասխան ընկերության հետ կապ հաստատել․ «Մենք ունենք Սիսիանի, Ջերմուկի օդանավակայանը, ունենք Շինուհայրինը, Գավառինը, Ստեփանավանինը: Եթե սա ճշմարտություն է, մեզ պետք է ոչ թե 500 մետր թռիչքուղի, այլ՝ 100 մետր․ սա նշանակում է, որ մենք ստանդարտ օդանավակայանի թռիչքուղու գնով կարող ենք 4 տեղ թռիչքուղի սարքել»,-ասել է նա՝ հավելելով, որ շանս կա առաջ անցնել պրոցեսից։ Վարչապետը հանձնարարել է «սինխրոնացնել» գործողությունները։