Ինչո՞ւ է Ռուսաստանն անհանգստանում Telegram-ի բազայի գաղտնազերծման հարցով

Telegram-ի հիմնադիր Պավել Դուրովի ձերբակալությունից հետո ՌԴ Անվտանգության խորհրդի նախագահի տեղակալ Դմիտրի Մեդվեդեւը երկրորդ անգամ սոցիալական X հարթակում գրառում է կատարել եւ կրկին պատմել, որ 2015 կամ 2016 թվականին ինքը նրան համագործակցության առաջարկություն է արել, բայց Դուրովը վճռականորեն ասել է, որ «տեղեկությունների բազայի գաղտնազերծման էլեկտրոնային բանալիները երբեք ոչ ոքի չի հանձնի»:
Մեդվեդեւը, սակայն, համոզված է, որ եթե նրա կյանքը «բարենպաստ չդասավորվի, իսկ այդպիսի նախանշաններ կան, ապա նա ոչ մի տեղ փախչել չի կարող»: Նման բարձրաստիճան պաշտոնյայի կողմից արված ենթադրությունն ավելի շատ նման է ունեցած տեղեկատվության հրապարակայնացման, որի նպատակը ստուգողական է. իսկ Ֆրանսիան ինչպե՞ս կարձագանքի:
Telegram-ը համաշխարհային հարթակ է, որից օգտվում են տասնյակ միլիոնավոր մարդիկ: Ռուսաստանի անհանգստությունը կասկածելի է: Մինչդեռ Վլադիմիր Պուտինի մամուլի քարտուղար Պեսկովը հավաստիացրել է, որ ՌԴ ոչ մի պաշտոնյա Telegram-ի հարթակում պետական նշանակության գրառումներ չի կատարում եւ երբեք չի կատարել:
Միջազգային մամուլում, սակայն, տեսակետ կա, որ Դուրովը ՌԴ «Անվտանգության դաշնային ծառայության գործակալ է»: Ի՞նչ գաղտնիքների է նա տիրապետում, որ կարող է հայտնել Ֆրանսիային: Նման դեպքերում հրապարակային բացահայտումներ չեն արվում, բայց հարաբերությունների նստվածքը մնում է: Այս առումով կարեւոր է, որ Ադրբեջանը վերջին տարում հակաֆրանսիական մի քանի միջոցառումներ է կազմակերպել, ինչպես նաեւ Կորսիկայում եւ Նոր Կալեդոնիայում Ֆրանսիայից անջատվելու շարժումներ է հովանավորում: Հնարավոր է, որ Դուրովը տեղյակ է Բաքվի հակաֆրանսիական քարոզչության գաղտնիքներին:

Թիվ 1 սյունակ, Վահրամ Աթանեսյան