Հայաստանը մասնակցելու է BRICS-ի գագաթնաժողովին` վարչապետ Նիկոլ Փաշինյանի մակարդակով. Factor.TV-ին ասել է ԱԺ ՔՊ խմբակցության պատգամավոր Սարգիս Խանդանյանը, եւ հայ քաղաքագետների համար թեմա է բացվել, որպեսզի երկրի արտաքին քաղաքականությունը անվանեն «աջաբսանդալ»:
Իբր՝ բա Եվրամիություն չե՞նք գնում:
Մեծ խելք պետք չէ հասկանալու համար, որ «Խաղաղության խաչմերուկը», կամ ռուս-ադրբեջանական տարբերակով «Զանգեզուրի միջանցքը» Եվրամիության տարածքով չէ, շենգենյան գոտում չէ: Իսկ ընդհանուր մոտեցում կա, որ «աշխարհագրությունը քաղաքականություն է»:
ԲՐԻԿՍ-ի անդամ են Ռուսաստանը, Չինաստանը, Հնդկաստանը, Իրանը, անդամության հայտ ներկայացրել են Թուրքիան եւ Ադրբեջանը:
Հայաստանի «խաղաղության խաչմերուկը» երկու՝ հորիզոնական եւ ուղղահայաց գծի վրա է կառուցված: Հորիզոնականը Չինաստանի ,
«մեկ գոտի՝ մեկ ճանապարհ» մեգանախագծի մաս է, իսկ ուղղահայացը՝ Հնդկաստան-Իրան-Հայաստան-Վրաստան՝ դեռեւս քննարկվող նախագծի:Ու՞մ հետ պիտի այդ էքզիստենցիալ նշանակության հարցը քննարկվի, եթե ոչ՝ Չինաստանի, Թուրքիայի, Հնդկաստանի, Իրանի, Ռուսաստանի եւ Ադրբեջանի:
Իսկ նշված բոլոր երկրների առաջնորդները ԲՐԻԿՍ-ի գագաթաժողովին մասնակցելու են: Մի մասը՝ տանտիրոջ, մյուսը՝ հյուրի կարգավիճակով:
Եթե Հայաստանի վարչապետը Կազան չմեկնի, մենք դրանից շահու՞մ ենք: Ոչ: Մասնակցությամբ միայն շահու՞մ ենք: Իհարկե՝ ոչ: Բայց չմասնակցությամբ մնում ենք տարածաշրջանի «աղքատ ազգական», որին խնջույքի սեղանի կռճոններն են մնում:
Թիվ 1 սյունակ, Վահրամ Աթանեսյան
