Հարավային Կալիֆոռնիայի իշխանությունները հայտարարել են անտառային սաստիկ հրդեհների պատճառով ավելի քան հինգ հազար մարդու տարհանման մասին, գրում է ամերիկյան New York Times թերթը՝ հղում անելով տեղի հրշեջ ծառայությանը։
«Կալիֆոռնիայում անվերահսկելի անտառային հրդեհն արագորեն տարածվում է, ավելի քան 5000 մարդու տարհանման հրաման է տրվել»,- ասվում է հաղորդագրությունում:
Հրդեհն սկսվել է հինգշաբթի՝ Լոս Անջելեսից արևելք գտնվող Հայլենդ քաղաքում։ Տեղի հրշեջ ծառայության տվյալներով՝ կիրակի առավոտվա դրությամբ կրակը չի հաջողվում մեկուսացնել և սպառնում է ավելի քան 8 հազար շինությունների։ Պարբերականի տվյալներով՝ շարունակվող շոգը մեծացնում է նոր հրդեհների վտանգը։
