Իրանական «Mehr» գործակալությունը խմբագրական է հրապարակել, որտեղ սուր քննադատության է ենթարկել Հայաստանի հանդեպ Ռուսաստանի քաղաքականությունը, որի պատճառով վարչապետ Նիկոլ Փաշինյանը «ստիպված է դիվերսիֆիկացնել անվտանության համակարգը»:
Երրորդ տարին է, ինչ Մոսկվան եւ Բաքուն թե՛ երկկողմ շփումներում, թե՛ պաշտոնական հայտարարությունների ձեւաչափում փորձում են Իրանին ներշնչել, որ հայ-ադրբեջանական սահմանին ԵՄ քաղաքացիական դիտորդները «լրտեսություն են կատարում եւ սպառնալիքներ հարուցում տարածաշրջանի երկրների, առաջին հերթին՝ Ռուսաստանի, Ադրբեջանի եւ Իրանի համար»:
Mehr-ը գրեթե պաշտոնական լրատվամիջոց է, գերազանցապես արտահայուտմ է Իրանի կառավարության եւ Գերագույն հոգեւոր առաջնորդի տեսակետները:
Հայաստանի անվտանգության համակարգի դիվերսիֆիկացման մասին դիտարկումը վկայում է, որ հայ-ադրբեջանական սահմանին ԵՄ դիտորդական առաքելությունը, Ֆրանսիայի եւ Հնդկաստանի, անգամ ԱՄՆ հետ ռազմական համագործակցությունն Իրանը սեփական շահերին սպառնալիք չի գնահատում: Դա հայ-իրանական հարաբերությունները զարգացնելու լուրջ նախադրյալ է, ինչպես նաեւ բացահայտում է, որ Իրանը խորքային առումով իր անվտանգությանը սպառնալիք է տեսնում ռուս-թուրք-ադրբեջանական ռազմավարական գործընկերությունը:
Իրանական լրատվամիջոցի խմբագրականն ավարտվում է Մոսկվային չափազանց խիստ նախազգուշացումով. Եթե նա այսպես կոչված «Զանգեզուրի միջանցքի» հարցում մոտեցումը չփոխի, ապա «ռուս-իրանական համապարփակ համագործակցության պայմանագիրը կարող է չստորագրվել»:
Թիվ 1 սյունակ, Վահրամ Աթանեսյան
