Ընդդիմությունը, երեւում է, նախապատրաստվում է «հուժկու» հանրահավաքի, ենթադրաբար՝ սեպտեմբերի 19-ին:
Նախապատրաստական քարոզչությունը մեկնարկել է. լրագրողներն Ազգային ժողովի նախագահ Ալեն Սիմոնյանից բացատրություն են պահանջել, թե ինչու՞ է ասել, որ իր համար «Լեռնային Ղարաբաղի նախագահ պաշտոնյա գոյություն չունի»:
Բացատրությունը տվել է Սամվել Շահրամանյանը, երբ հրամանագրով դադարեցրել է ԼՂՀ պետական մարմինների, կառույցների եւ պաշտոնյաների գործունեությունը:
Հասարակական հիմունքներով «պաշտոնավարող» նախագահ, ԱԺ խոսնակ, պետական նախարար, նախարար եւ պատգամավոր չի լինում: Հայաստանում կա ժողովրդի կողմից ընտրված մեկ իշխանություն:
Բայց հետաքրքիր է, որ անցած մեկ տարում ԼՂՀ նախկին որոշ պաշտոնյաներ, այդ թվում՝ նախարար, պատգամավոր, Հայաստանից տեղափոխվել են արտերկիր: Ցանկության եւ խիստ անհրաժեշտության դեպքում կարելի է անուններ հնչեցնել:
Եթե ԼՂՀ իշխանություն կա, օրինական է եւ գործում է, ապա ինչու՞ հրաժարական ներկայացրած նախարարի փոխարեն նորը չի նշանակվում կամ հանրությանը տեղյակ չի պահվում, որ այսինչ այսինչյանը վայր է դրել Ազգային ժողովի պատգամավորի մանդատը, ԿԸՀ-ն նրա փոխարեն, ըստ կուսակցության ցուցակի, պատգամավոր է ճանաչել այսինչ այսինչյանին: Ստացվում է, որ ԼՂՀ իշխանություն կա, բայց թե ինչով է զբաղված, ովքեր են այն ներկայացնում՝ ոչ ոք չգիտի:
Արթնանում է միայն այն ժամանակ, երբ «սրբազան շարժումը» նրա կարիքն զգում է, որպեսզի հանրահավաքային «մասսովկա» ապահովի:
Իսկ ու՞մ է պետք այդ չիշխանությունը, եթե գոնե մեկ բռնատեղահանված արցախցու հարց չի լուծում:
Թիվ 1 սյունակ, Վահրամ Աթանեսյան
