Վերջին օրերին Արեգակի վրա մի քանի պլազմայի արտանետումներ են գրանցվել, սակայն դրանք բոլորն ուղղվել են Երկրի կողքով: Այս մասին ֆեյսբուքյան իր էջում գրել է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։
«Պլազմային ամպերի մի մասը դուրս է մղվել Արեգակի հեռավոր կողմից և այս դիրքում, սկզբունքորեն, վտանգավոր չի համարվում: Սակայն անցյալ շաբաթ օրը՝ սեպտեմբերի 7-ին, մեր աստղի տեսանելի կողմում տեղի ունեցավ մեծ արտանետում, որն ամենայն հավանականությամբ, կդիպչի մեր մոլորակին իր եզրով:
Սա առիթ է դարձել երեքշաբթի՝ սեպտեմբերի 10-ի երեկոյան, թույլ և միջին մակարդակի G1 – G2 դասի մագնիսական փոթորիկների կանխատեսման համար։ Մոտ 30 տոկոս հավանականությամբ երկրի եվրոպական հատվածի հյուսիսային կեսում հնարավոր են բևեռափայլեր։
Արեգակի գործունեության մասին լուրերը դրանով չեն ավարտվում, քանի որ այսօր առավոտյան աստղը պլազմայի նոր մեծ զանգված է արտանետել, և այս անգամ գրեթե հենց Երկրի ուղղությամբ: Մեր մոլորակին դեմ առ դեմ նոր ամպի հավանականությունը 90%-ից ավելի է։
Ինչպես հաղորդում է Ռուսաստանի գիտությունների ակադեմիայի Տիեզերական հետազոտությունների ինստիտուտի Արևային աստղագիտության լաբորատորիայի կայքը արբանյակային պատկերներում նկատվում են արևային նյութի ամպ մոտ 30 միլիոն կիլոմետր հեռավորության չափով, որը շարժվում է մոտավորապես 800 կմ/վ արագությամբ:
Նման արագությունների դեպքում Արեգակից Երկիր հասբելու համար կպահանջվի մոտ 50 ժամ, այսինքն՝ արեգակնային զանգվածների ժամանումը նախնական սպասվում է սեպտեմբերի 11-ին օրվա կեսերին։
Այս սցենարը նշանակում է, որ Երկիրը կունենա արևային նյութի երկու հարված, որոնք ամենայն հավանականությամբ, կարող են միաձուլվել մեկ մագնիսական փոթորիկի մեջ, որը կտևի մոտ մեկ օր:
Սպասվում է, որ այս մագնիսական փոթորիկը կսկսվի երեքշաբթի երեկոյան Երևանի ժամանակով ժամը 19-ից հետո և կշարունակվի մինչև չորեքշաբթի կեսօր, առավելագույն ուժգնությամբ՝ անմիջապես կեսգիշերից հետո»։
