Սանկտ-Պետերբուրգում Իրանի Ազգային անվտանգության բարձրագույն խորհրդի եւ ՌԴ ԱԽ քարտուղարների հանդիպումից հետո Ադրբեջանի ԱԳՆ խոսնակ Այհան Հաջիզադեն Սյունիքում հաղորդակցությունների բացման շուրջ Հայաստանի դիրքորոշման առթիվ «ափսոսանք», է հայտնել:
Նա ասել է, որ Ադրբեջանն «այլընտրանք ունի» եւ Իրանի հետ քննարկում է այդ երկրի տարածքով դեպի Նախիջեւան «միջանցք կառուցելու» հարցը:
«Եթե Հայաստանը վարում է ինքնամեկուսացման քաղաքականություն, դա իր խնդիրն է, բայց այն օգտակար չի լինելու առաջին հերթին իրեն»-ասել է Հաջիզադեն: Իրանի տարածքում դեպի Նախիջեւան «միջանցք կառուցելու» ծրագիրը նորություն չէ:
Այն քննարկվել է դեռեւս անցյալ տարի: Երկու երկրների նախագահները մասնակցել են Ջեբրայիլի շրջանի Աղբենդ բնակավայրում Արաքսի վրայով ուղեանց կամրջի շինարարության հիմնարկեքի արարողությանը:
Այդ հաղորդուղին քննարկվել է նաեւ ռուս-իրանական բանակցություններում, ինչի առթիվ Վաշինգտոնը Բաքվին խիստ նախազգուշացում է արել այն իմաստով, որ Ադրբեջանը Ռուսաստանին փաստացի երկրորդ անցումն է տրամադրում, որպեսզի Մոսկվան ուղղակի կապ ունենա Պարսից ծոցի նավահանգիստների հետ:
Ադրբեջանի ԱԳՆ ներկայացուցչի հայտարարությունը խորքային իմաստով արտահայտում է իրավիճակի վերաբերյալ Մոսկվայի տեսակետը, որ կայանում է Հայաստանի վարչապետի առաջադրած «Խաղաղության խաչմերուկ» ծրագրի տապալման մեջ:
Թիվ 1 սյունակ, Վահրամ Աթանեսյան
