Ռոնալդուն պատմական արդյունքի է հասել՝ բոլոր սոցցանցերով հավաքելով 1 մլրդ հետևորդ

Կրիշտիանու Ռոնալդուն սոցցանցերում մեկ միլիարդ հետևորդ է հավաքել:

«Ալ Նասր»-ի և Պորտուգալիայի հավաքականի հարձակվողը հայտարարել է, որ բոլոր հարթակներում իր հետևորդների ընդհանուր թիվը կազմել է մեկ միլիարդ մարդ:

Նա հաշվի է առել Instagram-ը (639 061 429 բաժանորդ), Facebook-ը (170 509 113), X-ը (113 026 345), YouTube-ը (60 500 284) և չինական Կուաիշոու (9 372 710) և Վեիբու (7 530 121) սոցցանցերը:

«Մենք պատմություն կերտեցինք՝ 1 միլիարդ բաժանորդ: Սա ավելին է, քան պարզապես թիվ. դա վկայում է մեր ընդհանուր կրքի, էներգիայի, խաղի հանդեպ սիրո և այլնի մասին:

Մադեյրայի փողոցներից մինչև աշխարհի ամենամեծ մարզադաշտերը ես միշտ խաղացել եմ իմ ընտանիքի և ձեզ համար, և հիմա մենք միլիարդավոր ենք, և մենք միասին ենք:

Դուք ինձ հետ եք եղել ամեն քայլափոխի, բոլոր վերելքների ու վայրէջքների ընթացքում: Այս ճանապարհը մեր ճանապարհն է, և մենք միասին ցույց ենք տվել, որ սահմաններ չկան այն ամենի համար, ինչին մենք կարող ենք հասնել:

Շնորհակալ եմ ինձ հավատալու, ձեր աջակցության և իմ կյանքի մի մասը լինելու համար: Լավագույնը դեռ առջևում է, և մենք կշարունակենք պայքարել, հաղթել և միասին պատմություն կերտել», – գրել է Ռոնալդուն: